Buxheti i Italisë ka gjasa t’i kthehet dërguesit nga Komisioni Evropian.

Presidenti i Komisionit Jean-Claude Juncker tha të martën në një intervistë me agjensinë italiane të lajmeve ANSA se do të kishte një “reagim të dhunshëm” nga vendet e tjera të eurozonës nëse Brukseli do të pranonte propozimet e Romës, transmeton portali arbresh.info

Megjithatë, zyrtari më i lartë i BE-së nënvizoi se “paralajmërimet janë dhënë ndoshta para kohe, por asgjë nuk është vendosur deri tani dhe se e tëra varet nga bisedat tona me qeverinë italiane”.

“Italianët i kuptojnë gjërat mirë dhe ata e dinë se nuk mund të mbajnë më shume shpenzime se ato që kanë në arkën e shtetit”, tha ai.

Ndërkohë, Claudio Borghi, një ekonomist euroskeptik dhe deputet i lartë i Ligës, bëri thirrje që Brukseli dhe Roma të ulnin retorikën e tyre dhe t’i japin fund “luftës së fjalëve”.

Drafti i buxhetit të Italisë i paraqitur në Bruksel të hënën vonë konfirmon synimin e koalicionit të Lidhjes dhe 5Yjeve për të marrë hua më shumë për të financuar premtimet e fushatës së shtrenjtë.

Komisioni tani ka dy javë për t’u përgjigjur. Ndërkohë, veprimet e vlerësimit të borxhit sovran të Italisë nga Moody’s dhe Standard and Poor’s janë planifikuar për javën e ardhshme./arbresh.info/